អង្គការសហប្រជាជាតិ អនុញ្ញាតឱ្យរដ្ឋមន្រ្តីការបរទេសតាលីបង់ធ្វើដំណើរទៅចូលរួមកិច្ចប្រជុំជាមួយរដ្ឋមន្រ្តីការបរទេសប៉ាគីស្ថាន និងចិន
អន្តរជាតិ៖ ក្រុមមន្រ្តីការទូត និងកិច្ចការអន្តរជាតិបាននិយាយថា គណៈកម្មាធិការក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទម្សិលមិញនេះ បានយល់ព្រមអនុញ្ញាតឱ្យរដ្ឋមន្ត្រីការបរទេសរបស់រដ្ឋបាលក្រុមតាលីបង់ លោក Amir Khan Muttaqi ធ្វើដំណើរពីប្រទេសអាហ្វហ្គានីស្ថានទៅកាន់ប្រទេសប៉ាគីស្ថាននៅសប្តាហ៍ក្រោយ ដើម្បីជួបជាមួយរដ្ឋមន្ត្រីការបរទេសប៉ាគីស្ថាន និងរដ្ឋមន្រ្តីការបរទេសចិន។
គួរបញ្ជាក់ថា រដ្ឋមន្រ្តីការបរទេសនៃរដ្ឋាភិបាលក្រុមតាលីបង់ លោក Muttaqi ត្រូវបានរងបម្រាមធ្វើដំណើរជាយូរមកហើយ ដោយរួមមានទាំងការបង្កកទ្រព្យសកម្ម និងការដាក់ទណ្ឌកម្មអាវុធ ក្រោមការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ។
យោងតាមលិខិតមួយផ្ញើទៅកាន់គណៈកម្មាធិការនៃការដាក់ទណ្ឌកម្មរបស់ក្រុមប្រឹក្សាសន្តិសុខលើក្រុមតាលីបង់ដែលមានសមាជិក ១៥រូប បេសកជនអង្គការសហប្រជាជាតិរបស់ប៉ាគីស្ថានបានស្នើសុំការលើកលែងចំពោះ លោក Muttaqi គឺលើកលែងបំរាមចំពោះការធ្វើដំណើររវាងថ្ងៃទី៦ ដល់ថ្ងៃទី៩ ខែឧសភា សម្រាប់កិច្ចប្រជុំជាមួយរដ្ឋមន្ត្រីការបរទេសប៉ាគីស្ថាន និងរដ្ឋមន្ត្រីការបរទេសចិន។ យ៉ាងណាមិញ គេមិនបានបញ្ជាក់ថាជំនួបនៃកិច្ចប្រជុំនេះនឹងផ្តោតទៅលើបញ្ហាអ្វីឡើយ ប៉ុន្តែគេដឹងត្រឹមថាប៉ាគីស្ថាននឹងរ៉ាប់រងទាំងស្រុងរាល់ការចំណាយដែលទាក់ទងនឹងការធ្វើដំណើររបស់លោក Muttaqi។
មន្រ្តីការបរទេសរបស់ប៉ាគីស្ថាន និងចិនបាននិយាយនាពេលកន្លងមកថា ពួកគេនឹងស្វាគមន៍អាហ្វហ្គានីស្ថានដឹកនាំដោយតាលីបង់ចូលទៅក្នុងគម្រោងហេដ្ឋារចនាសម្ព័ន្ធច្រករបៀងសេដ្ឋកិច្ចចិន-ប៉ាគីស្ថាន (CPEC) ដែលមានតម្លៃរាប់ពាន់លានដុល្លារ ដែលជាផ្នែកនៃគំនិតផ្តួចផ្តើមខ្សែក្រវ៉ាត់ និងផ្លូវ។ ប្រទេសអាហ្វហ្កានីស្ថាន គឺជាតំបន់ពាណិជ្ជកម្ម និងផ្លូវឆ្លងកាត់ដ៏សំខាន់មួយ រវាងតំបន់អាស៊ីខាងត្បូង និងអាស៊ីកណ្តាល ហើយជាប្រទេសដែលមានធនធានរ៉ែតម្លៃរាប់ពាន់លានដុល្លារមិនទាន់ត្រូវបានប្រើប្រាស់។ គួររំឮកថា ក្រុមតាលីបង់បានដណ្តើមអំណាច និងគ្រប់គ្រងលើប្រទេសអាហ្វហ្កានីស្ថានទាំងស្រុងកាលពីខែសីហា ឆ្នាំ២០២១ នៅពេលដែលកងកម្លាំងដឹកនាំដោយសហរដ្ឋអាមេរិកបានដកខ្លួនចេញបន្ទាប់ពីសង្គ្រាមរយៈពេល ២០ឆ្នាំ។
វាមិនមែនជារឿងថ្មីនោះឡើយ ពោលគឺគណៈកម្មាធិការក្រុមប្រឹក្សាសន្តិសុខអង្គការសហប្រជាជាតិក៏ធ្លាប់បានអនុញ្ញាតឱ្យលោក Muttaqi ធ្វើដំណើរទៅកាន់ប្រទេសអ៊ូសបេគីស្ថានកាលពីខែមុនផងដែរ សម្រាប់ជំនួបកិច្ចប្រជុំរដ្ឋមន្ត្រីការបរទេសនៃប្រទេសជិតខាងអាហ្វហ្គានីស្ថាន ដើម្បីពិភាក្សាអំពីបញ្ហាសន្តិភាព សន្តិសុខ និងស្ថិរភាពជាបន្ទាន់ក្នុងតំបន់នេះ៕
ព័ត៌មានជាច្រើនទៀតសម្រាប់អ្នក
